दूतावासका कर्मचारीको बार्गेनिङ, राजदूत बेखबर

जापानमा औद्योगिक प्रशिक्षार्थी कामदार पठाउने कामले खासै सफलता हासिल गर्न नसकेको चौतर्फी गुनासो आइरहेका बेला जापानस्थित नेपाली दूतावासले मागपत्र प्रमाणीकरणमा कमिसन माग्ने गरेको खुलासा भएको छ ।

दूतावासका केही कर्मचारीहरुले मागपत्र प्रमाणीकरणका लागि मेनपावर कम्पनीसँग बार्गेनिङ गर्ने गरेको स्रोतले जानकारी दिएको छ । रोजगारदाता कम्पनीले दिएको माग दूतावासमा प्रमाणीकरण गराई वैदेशिक रोजगार विभागमा स्वस्कृतीको लागि पेश गर्ने र विभागले प्रमाणीकरण सही भए नभएको जाँच गर्न पुनः दूतावासमा पठाउने गरेको छ । यसरी पठाएका फाइल पास गराउन दूतावासका कर्मचारीहरु मेनपावरकम्पनीसँग रकम माग्ने गरेको स्रोतले बतायो । स्रोत भन्छ – टेबलमा फाइल राखेर दूतावासका कर्मचारीले मेनपावर कम्पनीलाई ‘तपाईंहरुले ल्याएको माग प्रमाणीकरण गर्न प्रक्रिया पुगेको छैन, चाँडै पु¥याईदिनुहोला’ भन्ने गरेका छन् र अहिले झण्डै १० वटा भन्दा बढि मेनपावर कम्पनीहरुको फाइल कमिसन नदिएका कारण दूतावासमा थन्किएको छ ।
दूतावासको यस कार्य प्रति जापानका लागि नेपाली राजदूत डा. गणेश योञ्जन भने बेखबर रहेका छन् । राजदूतको आँखा अगाडि खुलेआम कमिसन लेनदेन हुँदा पनि राजदूतलाई पत्तो नहुनु प्रति मेनपावर व्यवसायीहरुले आंशका व्यक्त गरेका छन् ।
जापानमा प्रशिक्षार्थी कामदार पठाउन १ सय ७१ मेनपावर कम्पनी सूचीकृत भएका छन् र यी मध्ये ३० वटा कम्पनीले माग ल्याई कामदार  पठाउने क्रम पनि सुरु भइसकेको छ ।
जापानमा प्रशिक्षार्थी कामदार पठाउन सुरु हुँदा ताका जे जति आशा देखिएको भए पनि विविध कारणले जापानको काममा अपेक्षाकृत सफलता हात लाग्न सकेन । जापानको काम सोचेअनुरुप हुन नसक्नुको पछाडि मेनपावर कम्पनीहरुलाई दोष देखाउने गरिएको छ । तर, दूतावासका कर्मचारीको यो रवैयाले जापानको काम सफल नहुनुमा मेनपावर कम्पनीभन्दा पनि दूतावासका कर्मचारीहरु नै जिम्मेवार रहेको देखिन्छ ।