भारतीय ज्यादतिविरुद्ध फिल्म बनाउँदा ज्यान धरापमा

राष्ट्रिय स्वाधीनताका पक्षमा बनेको चलचित्र दशगजाका निर्माता नवल खड्काले आफूले नेपालको सीमा मिचिरहेको भारतको गतिविधिको बारेमा चलचित्र बनाएका कारण भारतीय पक्षबाट आफू असुरक्षित भएको बताएका छन् ।

चलचित्रमा आफूले आफ्नै देशको जमिनमा बसेका सुस्तावासीप्रति भारतीय सीमा सुरक्षा बलले गरेको ज्यादतीलाई विशेष भूमिकामा देखाइएको र भारतले पटक(पटक सीमा मिच्दै गएको यथार्थतालाई दर्शाएकै कारण भारतले आफूलाई मार्नको लागि पिछा गरिरहेको पनि उल्लेख गरे । चलचित्र प्रदर्शन नगर्नको लागि भारतीय दूतावासबाट अप्रत्यक्षरुपमा चार करोडको प्रस्ताव आएको र उक्त प्रस्ताव आफूले सिधैं अस्वीकार गरेपछि भारतीय दूतावासले आफूलाई कालोसूचीमा राखी विशेष सुराकी परिचालन गरेको आशंका व्यक्त गरे ।

भारतीय दूतावासले चलचित्र नचलाउन मलाई चार करोडको प्रस्ताव गर्‍यो, उनले भने- मैले ठाडै अस्वीकार गरिदिएँ किनकि मेरो चलचित्र देश र जनताको लागि हो, मैले उक्त प्रस्ताव नस्वीकारेका कारण भारतले मेरो पिछा गरिरहेको छ ।

भारतीयहरुले नेपाली भूमि अतिक्रमण गरी नेपाली जनतालाई आफ्नै भूमिमा शरणार्थी जीवन जीउन बाध्य बनाएको र भारतको सो कार्यको प्रतिरोध गर्ने नेपाली जनताको संघर्षको कथा समेटिएको चलचित्र दशगजा निर्माणको क्रममा भारतीय पक्षले आफूलाई दुःख दिने गरेको खड्काले बताए । भारतले नेपालको हरेक क्षेत्रमा हस्तक्षेप गरेको बताउँदै त्यसका विरुद्ध जनतालाई सचेत गराउन आफूले दशगजा निर्माण गरेको उनको भनाइ थियो । भुटानी शरणार्थी समस्या पनि भारतकै कारण भएको भन्दै खड्काले भुटान र नेपालमा राजनीतिक अस्थिरता मच्चाएर भारतले आफ्नो स्वार्थ पूति गर्ने तर्फ लागेको बताए । ८४ लाखको लागतमा निर्माण गरिएको सो चलचित्रले प्रदर्शनको छोटो अवधिमै करिब लगानी उठाइसकेको उनको दावी थियो । भारतमा आफ्नो चलचित्रलाई रोक लगाए पनि  निकट भविष्यमा अमेरिका, मलेसिया, कतार, दुबईलगायतका देशहरुमा पनि प्रदर्शन गर्ने तयारी भएको उनले जनाए । खड्काले यसअघि माओवादी जनयुद्धको कथामा आधारित आवाज चलचित्र निर्माण गरेका थिए ।